ವಾರ್ಡ್‌ರೋಬ್‌ನಲ್ಲಿ ಹಲವಾರು ಉಡುಪುಗಳಿರುತ್ತವೆ. ಇವುಗಳ ಬಣ್ಣ, ವಿನ್ಯಾಸ ಇತ್ಯಾದಿಗಳು ಭಿನ್ನವಾಗಿರುತ್ತವೆ. ಆದರೆ ಈ ಪೈಕಿ ಹೆಚ್ಚು ಮುಖ್ಯವೆನಿಸುವುದು ಉಡುಪುಗಳ ಬಣ್ಣ. ಯಾಕೆಂದರೆ ವಿವಿಧ ಬಣ್ಣಗಳು ವಿವಿಧ ಭಾವನೆಗಳನ್ನು ಅರಹುತ್ತವೆ. ನಿಮ್ಮ ಮನಸ್ಥಿತಿ ಮತ್ತು ಭಾವನೆಗಳನ್ನು ವ್ಯಕ್ತಪಡಿಸುತ್ತವೆ. ಹಾಗಾದರೆ ನೀವು ಧರಿಸುವ ಉಡುಪುಗಳ ಬಣ್ಣ ನಿಮ್ಮ ಬಗ್ಗೆ ಏನು ಹೇಳುತ್ತದೆ ಎಂಬುದನ್ನು ತಿಳಿದುಕೊಳ್ಳಬೇಕೆ ಇಲ್ಲಿದೆ ಮೂರು ಬಣ್ಣಗಳ ಮಂತ್ರ.
ಕೆಂಪು:
ಜನರ ಗಮನ ಸೆಳೆಯುವ ಉದ್ದೇಶ ನಿಮಗಿದ್ದರೆ ಕೆಂಪು ಬಣ್ಣ ಉತ್ತಮ ಆಯ್ಕೆಯಾಗಿದೆ. ಇದರ ಜೊತೆಗೆ ತದ್ವಿರುದ್ಧ ಬಣ್ಣಗಳ ಉಡುಪುಗಳನ್ನು ಧರಿಸಿದರೆ ನೀವು ಪುರುಷ ಮತ್ತು ಮಹಿಳೆಯರೆಡೆಗೆ ಆಕರ್ಷಿತರಾಗುವುದರಲ್ಲಿ ಅನುಮಾನವೇ ಇಲ್ಲ. ಕೆಂಪು ಬಣ್ಣವು ಉತ್ಸಾಹ, ಪ್ರಾಬಲ್ಯ ಮತ್ತು ಹತೋಟಿಯ ಭಾವವನ್ನು ಹೊರ ಸೂಸುತ್ತದೆ. ಇದು ಅತ್ಯಂತ ಗಮನ ಸೆಳೆಯುವ ಬಣ್ಣವಾಗಿದ್ದು, ಈ ಬಣ್ಣದ ಉಡುಪು ಧರಿಸಿದವರು ಹೆಚ್ಚು ಆಕರ್ಷಕವಾಗಿ ಕಾಣುತ್ತಾರೆ.
ನೀಲಿ:
ಮೀಟಿಂಗ್ ಮತ್ತು ವಿಚಾರ ಸಂಕಿರಣಗಳಲ್ಲಿ ಪಾಲ್ಗೊಳ್ಳುವಾಗ ಮನಸ್ಸು ಶಾಂತವಾಗಿರಬೇಕಾಗುತ್ತದೆ. ಆದ್ದರಿಂದ ಇಂಥ ಸಂದರ್ಭಗಳಿಗೆ ನೀಲಿ ಬಣ್ಣದ ಉಡುಪುಗಳು ಹೆಚ್ಚು ಸೂಕ್ತ. ಇದು ವಿಶ್ರಾಂತಿ ಮತ್ತು ಶಾಂತಿಯ ಭಾವನೆ ಹೊರಹೊಮ್ಮಿಸುವುದರಿಂದ ಇತರರಲ್ಲಿ ಆರಾಮ ಭಾವನೆಯು ಮೂಡುತ್ತದೆ. ನಿಮ್ಮ ಯೋಜನೆಗಳಿಗೆ ಎಲ್ಲರ ಒಪ್ಪಿಗೆಯ ಮುದ್ರೆ ಸಿಗಬೇಕಿದ್ದರೆ ನೀಲಿ ಬಣ್ಣದ ಉಡುಪು ಉತ್ತಮ. ಈ ಬಣ್ಣವು ಸೃಜನಶೀಲ ಮತ್ತು ಕ್ರಿಯಾಶೀಲ ಮನಸ್ಥಿತಿಯನ್ನು ವ್ಯಕ್ತಪಡಿಸುವುದರಿಂದ ನಿಮ್ಮ ಸುತ್ತಮುತ್ತಲಿರುವ ಜನರು ಕೂಡಾ ಉತ್ಸಾಹದಿಂದ ತಮ್ಮ ಯೋಜನೆಗಳನ್ನು ಪ್ರಕಟ ಪಡಿಸುವರು.
ಕಪ್ಪು:
ಸಾರ್ವಕಾಲಿಕ ಸೊಬಗು ಮತ್ತು ಅನುರೂಪವಾದ ತಟಸ್ಥ ಛಾಯೆಯಿಂದ ಈ ಬಣ್ಣವು ಸದಾ ಕಾಲ ಪ್ರಸ್ತುತವೆನಿಸಿಕೊಳ್ಳುತ್ತದೆ. ಈ ಬಣ್ಣದ ಉಡುಪುಗಳನ್ನು ಯಾರು ಕೂಡಾ ಧರಿಸಬಹುದು. ಇದು ಯಾವುದೇ ರೀತಿಯ ದೇಹಾಕಾರಗಳಿಗೂ ಮತ್ತು ಯಾವುದೇ ಉಡುಪುಗಳಿಗೂ ಹೊಂದುತ್ತದೆ. ಇದು ಸ್ಲಿಮ್ ಲುಕ್ ಹೊಂದಿರುವ ಕಾರಣ ಫಾರ್ಮಲ್ ಸಮಾರಂಭಗಳಿಗೂ ಚೆನ್ನಾಗಿ ಕಾಣುತ್ತದೆ. ಆದರೆ ಕೆಲವರು ಈ ಬಣ್ಣವು ನಕಾರಾತ್ಮಕ ಭಾವನೆ ಮತ್ತು ಆಕ್ರಮಣಶೀಲತೆಯನ್ನು ಪ್ರತಿಬಿಂಬಿಸುತ್ತದೆ ಎಂದು ನಂಬಿದ್ದಾರೆ. ಇದನ್ನು ಕೆಂಪು, ಕಿತ್ತಳೆ ಅಥವಾ ಹಳದಿ ಬಣ್ಣಗಳ ಉಡುಪಿನ ಜೊತೆಗೆ ಧರಿಸಿದರೆ ನೀವು ಇನ್ನೂ ಸ್ಟೈಲಿಶ್ ಆಗಿ ಕಾಣುವಿರಿ.
