ಸೃಜನಶೀಲತೆ ಎನ್ನುವುದು ಜುವೆಲ್ಲರಿ ಡಿಸೈನರ್‌ಗಳಿಗೆ ಹೇಳಿಮಾಡಿಸಿದ ಕ್ವಾಲಿಫಿಕೇಶನ್. ಅದರಲ್ಲೂ ಮುಖ್ಯವಾಗಿ ಇಂದಿನ ಸ್ಪರ್ಧಾತ್ಮಕ ಯುಗದೊಳಗೆ ಜುವೆಲ್ಲರಿ ಡಿಸೈನರ್‌ಗಳಿಗೆ ಬೇಡಿಕೆಯಂತೂ ದಿನದಿಂದ ದಿನಕ್ಕೆ ಬೆಳೆಯುತ್ತಾ ಸಾಗುತ್ತಿದೆ. ಇಂತಹ ಡಿಸೈನರ್‌ಗಳಿಗೆ ಬೇಡಿಕೆ ಏರಿಕೆಯಾಗುತ್ತಿದ್ದಂತೆ ಅವರ ಪೂರೈಕೆ ಮಾತ್ರ ಕಡಿಮೆಯಾಗಿಯೇ ಉಳಿದುಬಿಟ್ಟಿದೆ. ಅಂದಹಾಗೆ ಚಿನ್ನ ಹಾಗೂ ವಜ್ರಗಳನ್ನು ತಮ್ಮ ತಮ್ಮ ಕ್ರಿಯಾಶೀಲತೆಗೆ ತಕ್ಕಂತೆ ವಿನ್ಯಾಸ ಮಾಡುತ್ತಾ ಲಕ್ಷಾಂತರ ಮನಸ್ಸುಗಳಿಗೆ ಹತ್ತಿರವಾಗುವ ಸೌಭಾಗ್ಯ ಜುವೆಲ್ಲರಿ ಡಿಸೈನರ್‌ಗಳಿಗೆ ಮಾತ್ರ ಒದಗಿ ಬರುತ್ತದೆ.
ಅದರಲ್ಲೂ ಮಹಿಳೆಯರಂತೂ ಚಿನ್ನದ ವಿನ್ಯಾಸಗಳಿಗೆ ಮಾರು ಹೋಗುತ್ತಾರೆ. ನಾನಾ ಬಗೆಯ ವಿನ್ಯಾಸಗಳಿಂದಲೇ ಚಿನ್ನ, ವಜ್ರಗಳ ಖರೀದಿ ನಡೆಯುತ್ತಾ ಹೋಗುತ್ತದೆ. ಪ್ರತಿಯೊಂದು ಸಣ್ಣ ಸಣ್ಣ ವಿನ್ಯಾಸಗಳು ಕೂಡ ಮಹಿಳೆಯರನ್ನು ಸೆಳೆದುಬಿಡುತ್ತದೆ. ಆದರೆ ಈ ಎಲ್ಲ ಕೈಚಳಕ ಜುವೆಲ್ಲರಿ ಡಿಸೈನ್‌ಗಳಿಂದ ನಡೆಯುತ್ತದೆ. ಯಾಕ್ ಅಂತೀರಾ ಯಾವುದೇ ಲೋಹಗಳಿರಲಿ ಅವುಗಳು ಕಚ್ಚಾ ರೂಪದಲ್ಲೇ ಇರುತ್ತದೆ. ಅವುಗಳಿಗೆ ಒಂದು ರೂಪ ಕೊಡುವ ತಾಕತ್ತು ಜುವೆಲ್ಲರಿ ಡಿಸೈನರ್‌ಗಳಲ್ಲಿ ಇರುತ್ತದೆ.
ಯುವಜನತೆ ಅದರಲ್ಲೂ ಕ್ರಿಯಾಶೀಲತೆಯನ್ನು ಬೆಳೆಸಿಕೊಂಡ ಮಂದಿ ಈ ಕ್ಷೇತ್ರವನ್ನು ಅಪ್ಪಿಕೊಳ್ಳಬಹುದು. ಚಿನಿವಾರ ಮಾರುಕಟ್ಟೆಯಲ್ಲಿರುವ ಉದ್ಯೋಗ ಮಾರುಕಟ್ಟೆಯನ್ನು ಕಳೆದರೆಡು ವರ್ಷಗಳಿಂದ ನಿರಂತರವಾಗಿ ನೋಡುತ್ತಾ ಹೋದಂತೆ ಈ ಜುವೆಲ್ಲರಿ ಡಿಸೈನರ್‌ಗಳಿಗೆ ಬೇಡಿಕೆ ಹೆಚ್ಚುತ್ತಾ ಹೋಗುತ್ತಿದೆ. ಅದರಲ್ಲೂ ಹೊಸ ಹೊಸ ಜುವೆಲ್ಲರಿ ಡಿಸೈನಿಂಗ್ ಕಂಪನಿಗಳು ತಮ್ಮ ಖಾತೆಯನ್ನು ತೆರೆಯುತ್ತಾ ಹೋಗುತ್ತಿದೆ. ಇವೆಲ್ಲವೂ ಜುವೆಲ್ಲರಿ ಡಿಸೈನರ್‌ಗಳಿಗೆ ರೆಡ್ ಕಾರ್ಪೆಟ್ ಸ್ವಾಗತ ದೊರೆಯುತ್ತಿದೆ.
ದೇಶದ ನಾನಾ ಕಾಲೇಜುಗಳು ಈ ಜುವೆಲ್ಲರಿ ಡಿಸೈನರ್ ಡಿಪ್ಲೊಮಾ, ಪದವಿ ಕೋರ್ಸ್‌ಗಳನ್ನು ಆರಂಭಿಸಿದೆ. ಅದಕ್ಕಾಗಿಯೇ ನಾನಾ ಬಗೆಯ ಪ್ರವೇಶ ಪರೀಕ್ಷೆಗಳನ್ನು ನಡೆಸುತ್ತಿದೆ. ಎನ್‌ಐಎಫ್‌ಟಿ ಸಂಸ್ಥೆ ಡಿಸೈನಿಂಗ್‌ಗಳಿಗೆ ಮಾತೃ ಸಂಸ್ಥೆಯಾಗಿ ಕಾಣಿಸಿಕೊಳ್ಳುತ್ತದೆ. ಇಲ್ಲಿ ಕೋರ್ಸ್‌ಗಳ ಜತೆಗೆ ಉದ್ಯೋಗಗಳನ್ನು ದಕ್ಕಿಸಿಕೊಡುತ್ತದೆ.ಭೌತಶಾಸ್ತ್ರ, ರಸಾಯನ ಶಾಸ್ತ್ರ ಹಾಗೂ ಗಣಿತಶಾಸ್ತ್ರದಲ್ಲಿ ಶೇ.೬೦ ಪಡೆದಿರಬೇಕು. ಆದರೆ ಪರಿಶಿಷ್ಟ ಜಾತಿ/ಪಂಗಡಗಳಿಗೆ ವಿನಾಯಿತಿ ಇದೆ. ಅದಕ್ಕೂ ಮುಖ್ಯವಾಗಿ ಬಹಳಷ್ಟು ಸರಕಾರಿ ಕಾಲೇಜುಗಳು ಕೂಡ ಇಂತಹ ಶಿಕ್ಷಣವನ್ನು ನೀಡುತ್ತಿದೆ. ಕೆಲವೊಂದು ಖಾಸಗಿ ಸಂಸ್ಥೆಗಳು ತಮ್ಮದೇ ಆದ ಪರೀಕ್ಷೆಗಳ ಮೂಲಕ ವಿದ್ಯಾರ್ಥಿಗಳನ್ನು ಆಯ್ಕೆಮಾಡಿಕೊಳ್ಳುತ್ತದೆ. ಮುಖ್ಯವಾಗಿ ಪರೀಕ್ಷೆಗಳು ಥಿಯೆರಿ ಹಾಗೂ ಪ್ರಾಕ್ಟಿಕಲ್‌ಗಳನ್ನು ಒಳಗೊಂಡಿರುತ್ತದೆ. ಇದರ ಜತೆಯಲ್ಲಿ ಕೆಲವೊಂದು ಕಾಲೇಜುಗಳು ಕಲಿಯುವ ಹಂತದಲ್ಲಿಯೇ ಸ್ಕಾಲರ್‌ಶಿಫ್‌ಗಳನ್ನು ನೀಡುವ ಪದ್ಧತಿಯನ್ನು ಇಟ್ಟುಕೊಂಡಿದೆ.
ಕೆಲಸದ ವ್ಯಾಪ್ತಿ ಹಾಗೂ ಸಂಬಳ:
ವಿದ್ಯಾರ್ಥಿಯೊಬ್ಬ ಜುವೆಲ್ಲರಿ ಡಿಸೈನಿಂಗ್‌ನಲ್ಲಿ ಶಿಕ್ಷಣ ಪಡೆದುಕೊಂಡ ನಂತರ ಜುವೆಲ್ಲರಿ ಕಂಪನಿಯೊಂದಕ್ಕೆ ಜೂನಿಯರ್ ವಿಶುವಲೈಸರ್ ಅಥವಾ ಡಿಸೈನರ್ ಆಗಿ ಸೇರಿಕೊಳ್ಳಬಹುದು. ಇದರ ಜತೆಯಲ್ಲಿ ಪದವಿ ಶಿಕ್ಷಣ ಪಡೆದರೆ ಒಳ್ಳೆಯ ಸಂಬಳ ಕೂಡ ಪಡೆಯುವಲ್ಲಿ ಸಂದೇಹ ಇರುವುದಿಲ್ಲ. ಅಷ್ಟಕ್ಕೂ ಜುವೆಲ್ಲರಿ ಡಿಸೈನರ್ ಒಬ್ಬ ಪಡೆಯುವ ಸ್ಯಾಲರಿ ಎಷ್ಟು ಗೊತ್ತಾ ಪ್ರತಿ ತಿಂಗಳಿಗೆ ೨೦ ರಿಂದ ೪೫ ಸಾವಿರ ರೂಪಾಯಿಯನ್ನು ಆರಂಭಿಕ ಹಂತದಲ್ಲಿ ಪಡೆಯಬಹುದು. ಆರಂಭದಲ್ಲಿ ಜುವೆಲ್ಲರಿ ಡಿಸೈನರ್ ಶಿಕ್ಷಣ ಪಡೆಯುತ್ತಿದ್ದಾಗ ವಿದ್ಯಾರ್ಥಿಗಳು ಜುವೆಲ್ಲರಿ ಕಂಪನಿಯಲ್ಲಿ ಇಂಟರ್ನ್‌ಶಿಪ್ ಮಾಡಿಕೊಳ್ಳಬೇಕು.
ಜುವೆಲ್ಲರಿ ಡಿಸೈನ್‌ನಲ್ಲಿದೆ ಬಂಗಾರದ ಬದುಕು
