ಮೀನುಗಾರಿಕೆ ವಿಜ್ಞಾನ ಅಪಾರ ಉದ್ಯೋಗಾವಕಾಶಗಳನ್ನು ಹೊಂದಿರುವ ಒಂದು ವೃತ್ತಿಪರ ಪದವಿ ಕೋರ್ಸ್ ಆಗಿದೆ. ಮೀನುಗಾರಿಕೆ ಹಲವು ಚಟುವಟಿಕೆಗಳ ಸಮ್ಮಿಶ್ರ ಉದ್ದಿಮೆಯಾಗಿದ್ದು ಮತ್ಸ್ಯ ಸಂಪನ್ಮೂಲಗಳ ನಿರ್ವಹಣೆ, ಆಧುನಿಕ ಮೀನು ಹಿಡಿಯುವ ವಿಧಾನಗಳು ಮತ್ತು ನಂತರದ ಸಂಸ್ಕರಣೆಯ ತಂತ್ರಜ್ಞಾನ, ಮೀನು ಮಾರುಕಟ್ಟೆ ನಿರ್ವಹಣೆ, ಮೀನು ಸಾಕಣೆ ಮುಂತಾದ ಕ್ಷೇತ್ರಗಳನ್ನು ಒಳಗೊಂಡಿದೆ.
ಮೀನು ಮತ್ತು ಅದರ ಮೌಲ್ಯವರ್ಧಿತ ಉಪಉತ್ಪನ್ನಗಳ ರಫ್ತಿನಿಂದ ದೇಶ ವರ್ಷಂಪ್ರತಿ ಸುಮಾರು ೮ ಸಾವಿರ ಕೋಟಿ ರೂ.ಗಳಷ್ಟು ವಿದೇಶಿ ವಿನಿಮಯ ಗಳಿಸುತ್ತಿದೆ. ಅಲ್ಲದೇ, ಅಷ್ಟೇ ಬೃಹತ್ ಮೌಲ್ಯದ ಆಂತರಿಕ ಮಾರುಕಟ್ಟೆಯನ್ನೂ ಸಹ ಹೊಂದಿದೆ. ಮೀನು ಮತ್ತು ಸಿಗಡಿ ಸಾಕಣೆಯಿಂದ ದೇಶದಲ್ಲಿ ಅತ್ಯಕ ಪ್ರಮಾಣದಲ್ಲಿ ಪೌಷ್ಟಿಕ ಆಹಾರ ಉತ್ಪಾದನೆ ಆಗುತ್ತಿದ್ದು, ಇತರೇ ಕೃಷಿ ಕ್ಷೇತ್ರಗಳಿಗೆ ಹೋಲಿಸಿದರೆ, ಮೀನು ಸಾಕಣೆಯ ವಾರ್ಷಿಕ ಉತ್ಪಾದನಾಗತಿ ಶೇಕಡಾ ಆರರಷ್ಟಿದ್ದು ಅದು ಪ್ರಥಮ ಸ್ಥಾನದಲ್ಲಿದೆ.
ದೇಶದಲ್ಲಿ ಈಗ ಒಟ್ಟು ೧೬ ಮೀನುಗಾರಿಕಾ ಕಾಲೇಜುಗಳು ಕಾರ್ಯ ನಿರ್ವಹಿಸುತ್ತವೆ. ಮೀನುಗಾರಿಕೆ ವಿಜ್ಞಾನ ಹಲವು ವಿಜ್ಞಾನಗಳ ಸಮ್ಮಿಶ್ರ ವಿಜ್ಞಾನವಾಗಿದ್ದು ಮೀನುಗಾರಿಕೆ ಜೀವಶಾಸ್ತ್ರ, ರಸಾಯನ ಶಾಸ್ತ್ರ, ಸೂಕ್ಷ್ಮ ಜೀವಿ ಶಾಸ್ತ್ರ, ಜಲಕೃಷಿ, ಜಲಜೀವಶಾಸ್ತ್ರ, ಮೀನುಗಾರಿಕೆ ಎಂಜಿನಿಯರಿಂಗ್, ಮೀನುಗಾರಿಕೆ ಅರ್ಥಶಾಸ್ತ್ರ, ಮೀನಿನ ಸಂಸ್ಕರಣೆ, ದೋಣೆ ಮತ್ತು ಬಲೆಗಳ ರಚನೆ, ಮೀನುಗಾರಿಕಾ ಸಂಖ್ಯಾಶಾಸ್ತ್ರ ಮತ್ತು ಅರ್ಥಶಾಸ್ತ್ರ ಮುಂತಾದ ವಿಷಯಗಳನ್ನು ಒಳಗೊಂಡಿದೆ.
ಉದ್ಯೋಗಾವಕಾಶಗಳು:
ಮೀನುಗಾರಿಕಾ ಪದವೀಧರರಿಗೆ ಮೀನುಗಾರಿಕೆ ಕ್ಷೇತ್ರದಲ್ಲಿ ಅಪಾರ ಉದ್ಯೋಗಾವಕಾಶಗಳಿವೆ. ಮೀನುಗಾರಿಕೆ ಉದ್ಯಮ ಬಹುಕೋಟಿ ಬೃಹತ್ ಉದ್ಯಮವಾಗಿದ್ದು ಇಲ್ಲಿ ಮೀನುಗಾರಿಕೆ ಪದವಿ ಪಡೆದವರಿಗೆ ಸಾಕಷ್ಟು ಬೇಡಿಕೆ ಇದೆ. ಉದ್ಯಮದಲ್ಲಿರುವ ಬೇಡಿಕೆಗೆ ಹೋಲಿಸಿದರೆ ತಯಾರಾಗುತ್ತಿರುವ ಪದವೀಧರರ ಸಂಖ್ಯೆ ಕಡಿಮೆಯೆಂದೇ ಹೇಳಬೇಕು.
ಮೀನುಗಾರಿಕೆ ಪದವೀಧರರು ರಾಜ್ಯ ಹಾಗೂ ಕೇಂದ್ರ ಸರಕಾರಗಳ ಮೀನುಗಾರಿಕೆ ಇಲಾಖೆಗಳಲ್ಲಿ ಅಧಿಕಾರಿಗಳಾಗಿಯೂ, ವಿಶ್ವವಿದ್ಯಾಲಯಗಳಲ್ಲಿ ಹಾಗೂ ಕೇಂದ್ರೀಯ ಸಂಶೋಧನಾ ಸಂಸ್ಥೆಗಳಲ್ಲಿ ಮತ್ಸ್ಯಸಂಸ್ಕರಣೆ ಕ್ಷೇತ್ರದಲ್ಲಿ ಗುಣಮಟ್ಟ ನಿಯಂತ್ರಣಾಕಾರಿಗಳಾಗಿಯೂ ಉದ್ಯೋಗ ಪಡೆಯಬಹುದಾಗಿದೆ. ಕೃಷಿ ವಲಯದಲ್ಲಿನ ಸರಕಾರ ಹಾಗೂ ಸರಕಾರೇತರ ಸಂಸ್ಥೆಗಳಲ್ಲಿ ವೈವಿಧ್ಯಮಯ ಉದ್ಯೋಗಾವಕಾಶಗಳಿವೆ.ಅವರು ಕೃಷಿ ಮಾರುಕಟ್ಟೆ ಅಕಾರಿಗಳಾಗಿ, ಕೃಷಿ ವ್ಯಾಪಾರ ಮ್ಯಾನೇಜರ್‌ಗಳಾಗಿ, ಕೃಷಿ ಗುಣಮಟ್ಟ ತಪಾಸಣಾಕಾರಿಗಳಾಗಿ, ತಾಂತ್ರಿಕ ಅಕಾರಿಗಳಾಗಿ, ಕೃಷಿ ಕ್ಷೇತ್ರದ ಸಲಹಾ ತಜ್ಞರಾಗಿ ಕಾರ್ಯನಿರ್ವಹಿಸಬಹುದು. ಅಲ್ಲದೇ, ಮೀನುಗಾರಿಕೆ ಪದವೀಧರರು ಸ್ವತಃ ತಾವೇ ಲಾಭದಾಯಕ ಸ್ವ ಉದ್ಯೋಗ ಸೃಷ್ಟಿಸಿಕೊಳ್ಳಬಹುದಾಗಿದೆ.
ಉನ್ನತ ವ್ಯಾಸಂಗಕ್ಕೂ ದಾರಿಯಿದೆ:
ನಾಲ್ಕು ವರ್ಷಗಳ ಮೀನುಗಾರಿಕೆ ಪದವಿ ನಂತರ ಉನ್ನತ ವ್ಯಾಸಂಗಕ್ಕೆ ವಿಫುಲ ಅವಕಾಶಗಳಿವೆ. ಮೀನುಗಾರಿಕೆ ಪದವಿ ಕೋರ್ಸ್‌ನಲ್ಲಿ ಮೂಲ ವಿಜ್ಞಾನಗಳ ವಿಷಯದ ಜತೆಗೆ ಸಾಮಾಜಿಕ ವಿಜ್ಞಾನಗಳ ವಿಷಯಗಳಲ್ಲೂ ಶಿಕ್ಷಣ ಲಭ್ಯವಿದ್ದು, ಇದರಿಂದಾಗಿ ಆ ಪದವೀಧರರು ಹೆಚ್ಚಿನ ಬೇಡಿಕೆಯಲ್ಲಿರುವ ಅನ್ವಯಿಕ ವಿಜ್ಞಾನದ ವಿಷಯಗಳಾದ ಮಾಲಿಕ್ಯುಲಾರ್ ಬಯಾಲಾಜಿ, ಬಯೋಟೆಕ್ನಾಲಜಿ, ಬ್ಯುಸಿನೆಸ್ ಮ್ಯಾನೇಜ್‌ಮೆಂಟ್, ಮೈಕ್ರೋಬಯಾಲಜಿ, ಜೆನೆಟಿಕ್ಸ್ ಮತ್ತು ಬ್ರೀಡಿಂಗ್ ಮುಂತಾದ ಕ್ಷೇತ್ರಗಳಲ್ಲಿ ಉನ್ನತ ವ್ಯಾಸಂಗ ಮಾಡಬಹುದಾಗಿದೆ. ಸ್ನಾತಕೋತ್ತರ ಹಾಗೂ ಡಾಕ್ಟರೇಟ್ ಪದವಿ ಕೋರ್ಸ್‌ಗಳಿಗೆ ರಾಷ್ಟ್ರ ಹಾಗೂ ಅಂತಾರಾಷ್ಟ್ರೀಯ ಪ್ರತಿಷ್ಟಿತ ಶಿಕ್ಷಣ ಸಂಸ್ಥೆಗಳಲ್ಲಿ ಹಲವಾರು ಫೆಲೋಶಿಪ್ ಹಾಗೂ ಸ್ಕಾಲರ್‌ಶಿಪ್‌ಗಳೂ ದೊರಕುತ್ತಿದ್ದು ,ಇದರ ಪ್ರಯೋಜನವನ್ನು ಪಡೆಯಬಹುದು. ಈ ಮೂಲಕ ಉದ್ಯೋಗ ಮಾರುಕಟ್ಟೆಯಲ್ಲಿ ಹೊಸ ಅವಕಾಶಗಳನ್ನು ಜತೆಯಲ್ಲಿಯೇ ಬಾಚಿಕೊಳ್ಳಬಹುದು.
ಅವಕಾಶದ ಬಲೆಯಲ್ಲಿ ‘ಮೀನುಗಾರಿಕೆ ವಿಜ್ಞಾನ ’
